Exo 5 | ZomZIV | STEP | Tua nung ciangin Pharaoh kiangah Moses le Aaron pai uh a, “Hih in TOPA Israel’ Pasian thugen ahi hi: “Sehnel gamsungah pai-a kei tungah pawi a bawl theih nadingun ka mite paisak in,’ ci hi,” a ci uh hi.

Exodus 5

Buhtu loin Leisek Seek

1 Tua nung ciangin Pharaoh kiangah Moses le Aaron pai uh a, “Hih in TOPA Israel’ Pasian thugen ahi hi: “Sehnel gamsungah pai-a kei tungah pawi a bawl theih nadingun ka mite paisak in,’ ci hi,” a ci uh hi. ^a

2 Pharaoh in, “Keimah in ama thu manga Israel ka paisak nadingin TOPA kua ahi hiam? TOPA ka thei kei hi; Israel ka paisak kei ding hi,” a ci hi.

3 Tua ciangin amaute in Hebrew-te’ Pasian ko tawh ka kimu zo uh hi. Tu-in TOPA kote Pasian tungah biakpiakna pia dingin ni thum paina sehnel gam sungah hong paisak in, tua hi kei leh amah in pulpi ahikeh namsau tawh kote hong vat kha ding hi,” a ci uh hi.

4 Ahi hangin Egypt kumpipa in, “Moses le Aaron aw, bang hanga nasep taisan-in mite paimangpih ding na hi uh hiam? Na nasepna-uah pai un!” a ci hi. 5 Tua ciangin Pharaoh in, “En un, gam mite tam mahmah uh hi; amaute nasem kimlai tawpsaksak uh hi!” a ci hi. ^b

6 Tua ni mahin Pharaoh in sila ukte le mipite’ makaite tungah hih thu a pia hi: 7 “Note in tua mite tungah leisek seekna-a zat ding buhtu puak nawn kei un; amaute pai-in amau zat ding zongtawm uh hen. 8 Ahi hangin a masa-a, a seek zah mah uh a seek dingun sawl un; a seek ngei zah uh khiam kei un. Amaute thadah uh hi; tua hangin, ‘Ka Pasian uh biakpiakna pia dingin hong paisak in,’ ci uh hi. 9 Amaute in na semden-a, zuauna a thudon loh nadingun nasep haksazaw semsak un,” a ci hi. ^c

10 Tua ciangin sila ukte le mipi makaite paikhia in mite tungah, “Hih in Pharaoh cih ahi hi: ‘Buhtu kong pia nawn kei ding hi. 11 Na muh theihna peuhpeuh-uah pai-in no ading zong tawm un; ahi hangin na nasep zah uh kikhiam lo ding hi,’ ci hi,” a ci uh hi. 12 Tua ciangin buhtu tanga zat ding lopa keu kaikhawm dingin mite Egypt gamsung khempeuhah a kikhenthang uh hi. 13 Sila ukte in amaute kiangah, “Buhtu na neih lai-ua ni khata note zawh dinga hong kisawl zah tektek mah zosiang un,” ci-in a nawh niloh uh hi. 14 Pharaoh’sila ukte in a seh uh Israel makaite kisatin amaute kiangah, “Bang hangin a masate bangin zan hi taleh tuni hi taleh na nasep ding zah uh sem lo na hi uh hiam?” ci-in kidong hi. ^d

15 Tua ciangin Israel mipi makaite Pharaoh kiangah pai-in, “Bang hangin na nasemte hong hici bawl na hi hiam? 16 Na nasemte buhtu hong kipia lo napi, ‘Leisek seek un;’ hong kici hi. Na nasemte hong kisatsat hi, ahi hangin tua pen na mipihte mawhna ahi hi,” a ci uh hi.

17 Pharaoh in, “Thadah, tua pen na thadah man uh hi! Tua hangin “TOPA tungah biakpiakna pia dingin hong paisak in,’ na ci den uh hi. 18 Tu mahmah in na sem un. Buhtu khat beek hong kipia nawn lo dinga ahi zongin leisek na seek ngei zah mah uh na seek pelmawh ding uh hi,” a ci hi.

19 Israel makaite tungah, “Nisima na seek ngei zah uh leisek a kikhiam tuan kei hi,” a kicih ciangin amaute in a lunghimawh huaina a phawk uh hi. 20 Pharaoh kiang pan a paikhiat uh ciangin amaute tawh kimu dinga ngak Moses le Aaron mu uh a 21 amaute in, “TOPA in, hong enin thu hong khen ta hen! Note in kote Pharaoh le a nasemte tungah a namsia nong suaksak uh a, kote thah nading amaute khutah namsau na koih uh hi,” a ci uh hi.

Hotkhiat Nadinga Pasian Thuciam

22 TOPA kiangah Moses kihei kik in, “Topa aw, bang hangin hih mite tungah lungkhamna tungsak na hi hiam? Hih bang dinga kei hong sawl na hi hiam? 23 Pharaoh tungah nangma minin thu gen dinga ka pai nungsang, amah in hih mite tungah lungkhamna tungsaka, nang lah na mite na honkhia kei hi,” a ci hi.